自主權

今日本來起左一份稿，但到夜晚７點，中正又再叫我即晚起多一份，結果攪到１點幾先至有得走！同組的同事一早已經走晒，有點迷惘！

努力工作，只為追回這４年的經驗。同期的行家已經當上supervisor，反觀自己仍做緊trainee，未至於很難受，之前聽好友P的鼓勵－－「沉著應戰」！

BUT，曾經試過很努力工作，結果一瞬間什麼都沒有！人生無常，過得自己過得人便好了！至少在這４年艱難的日子裏，還有得著很多呢！自己不應看得太灰，枉費咁多人的努力！

說返上星期六，第一次交稿俾中正，之前還擔心一大餐，結果．．．登！登！登！一粒字都唔駛改，竟然仲被佢讚添！好感動！

同事們近排笑笑口咁勸我，咁勤力無用，佢哋只會俾多ｄ嘢我做！多嘢做係好，咁即係我多ｄ片出街囉！由每日１條片至聽日開始４條片喎，幾好０架！不過每日要提住自己－－「驕兵必敗」這個恒常道理！

昨天倍Honey配眼鏡，很開心！我諗可能工作忙，的確開心咗好多！至少知道我還有工作能力，我相信神放我在這個位置，必定有祂的理由，一定有！只是我未攪清楚．．．

最失落應算是少了時間倍屋企人，我知母親大人很關心我的健康和感情著落。少了時間update新聞，少了時間休息，最安慰便是每星期日放假可以返教會聽講道，好似幫我打補針一樣，也是黑暗中的明燈。

今早偶然遇上朋友仔Y，傾咗一陣就各行各路。遲ｄ有時間一定要找他傾多耐ｄ，趁佢近排心情無乜異樣，無計啦！十幾廿年老朋友，好難有個咁錫我既朋友咯！抵我錫佢既！

人在做，天在看！心靈總有從祂而來的說話，這是好的！

昨天我聽完「我豈是看守我的弟兄嗎？」講道之後，我想起這篇講道，提及第一宗謀殺案，該隱殺阿伯的故事，可能是神的串連，結果被我估中！祂藉講道提醒我，這是好的！雖然我還未達標，最緊要是祂明白，「珍珠」只不過係過眼雲煙！

己所不欲，勿施於人！

「己所不欲，勿施於人！」今天我送了這句話給同學仔F。

事原係我早兩日聽到第二組同事傳返嚟俾我聽，F覺得自己不適合這份工作，並且已萌去意。這是事實（見親佢都同我講），同時也是流言。我慣常處理蜚語的方法，必定先會直接找當事人，不太喜歡把說話傳來傳去，免得自己估錯，錯怪好人。這個方法是多年老朋友兼恩人John傳授，John當年曾對我說，真正的關心是直接，間接果ｄ叫......！我認同他這個做法，所以沿用多年。

Lunch時，我單獨與F一起，他向我吐完苦水之後，我便提醒他，別再向其他人說這些悔氣話，免得惹人誤會。起初他不聽我勸，以為我唔俾佢發洩不滿，後來我叫他易地而處，想想如果他做老闆，收到風呢個員工成日喊走，呢樣不滿，果樣又不滿，正常老闆都會認為他工作不會認真到那裏去！何苦自己明明不是那種人，偏偏要迫人誤會自己呢？我明言這是他任性的責任！他好像突然醒了！

讓我感到安慰是他知道我的出於關心，而非說三道四搬弄是非。至於箇中道理，則要看他的造化了。

經驗讓我更清楚明白，將說話傳來傳去，有機會傷害到別人！因為當我轉述別人的說話時，加入自己主觀評估，最重要係極有可能估錯，萬一傷害隨之而來，凡事不一定可以修補，尤其人的感情，可免則免！

說話若非造就別人，榮神益人，更甚是傷害別人的話，寧願自己是個啞巴，反而穩妥，起碼少了一宗罪！

M問我會否動怒嬲人，我順口答：唔會！
「阿邊個都唔會？」「唔會！」
嬲人鬧人咁嘥神既事，我呢ｄ懶人唔做，勸完就算！
珍珠還是自己Keep，好過俾隻豬；
豬食完珍珠不會言謝，倒會反咬自己，試過太多次，何苦呢！
人哋做乜，唔代表自己要跟住做既！
人哋死，唔通又跟埋佢去死咩！

高傲還是害羞?

今早剛巧與張國榮同一班公司車，兼且同一架lift......

完咗個course之後，一直以來他沒有跟我們打招呼，同學仔認定他是獨家村。
自己一個人食飯，自己一個人在公司行來行去，
M仲好笑，因他經常神出鬼沒，呢頭見完佢喺canteen，果頭即刻竟然見到佢喺６樓行喺我哋前面，話佢係twins，好驚！

張國榮的才華在於他的低調，周星馳風格罷，他入行應該比周還要早得多。一字一句皆風趣幽默，可惜沉默寡言，似是不著跡的努力。其實我不清楚......

一直很期望有機會再跟他學習！今天返工搭車時，偶然温習上月的筆記，豈料......

在升降機內，他問：「你而家派咗去邊一組？」「生活台。」
「吓！仲未還返嚟咩？」「他們不夠人，仲有一個位未請到人。」
他不洩地：「死咗條心喇！唔會調返嚟架嘞！」「所以我咪得閒温返以前ｄ筆記先囉！」
他好奇地問：「乜你哋有筆記咩？」「我以前上堂果陣有寫筆記，你都有份......」
又再不洩地：「掉咗佢喇！無用架！」
升降機門開了，後面遠處傳來他fade out的聲音：「無得返嚟架嘞！死咗條心喇！」
俾佢笑死！

之後，我跟同學仔好開心咁講，張國榮竟然主動同我打招呼！佢哋便笑我一定用咗咩暴力叫佢就範，如果唔係既話，佢唔會同人打招呼架喎！

平時佢見到我哋任何一個，都會兜路行。不過頭先晏晝，佢竟然又行過我身邊，奇蹟呀！我便笑笑問佢食唔食朱古力，佢就擰晒頭「俾咗好多個五」添！佢竟然望到我喎！

同一日發生咗兩次「奇蹟」之後，我突然覺得，可能他似係怕羞，多過好似其他人以為佢睇唔起人？？

努力! 加油!

今日見到Benson等lift果陣好攰咁，好多嘢要跟，好辛苦！我問佢想食乜嘢，我請佢食幫佢打打氣，佢竟然答想食雞蛋仔，點買呀？跟住就話想食芒果乾和粟子。

下午４點左右已經無乜嘢做，Z要我等佢倍佢食Dinner，一等就等到７點。食飯果陣，M & Z ２隻嘢又講「不嘢無」講到雞啄唔斷。

我忍唔住問佢哋，點解唔諗吓直接同佢講ｄ問題？
Z問我，他是否不夠大方？我答是。
M反駁說，不應難為自己。
佢哋反問我，如果換轉係我會唔會嬲？
當時我答唔會。

我常以為自己已變成無乜脾氣，可是人始終...好難講！
細Honey讚我把口甜到漏，「乙水」死人，
聽到這些話提醒自己更加要小心！
因為越懂得逗人歡喜，對於我來說，便即是越識得傷害人
（唔知從幾時開始，我忘記了自己有這種說話傷人的能力，感謝神！）...惟有希望自己EQ有進步，雖然唔知道幾時我會再發脾氣，不過都希望自己懂得處理負面情緒！

「己所不欲勿施於人，愛主所愛，惡主所惡，忠心事主！」
這是昨天所學到，持之以恒又是一條艱辛之路！

放工之後，我叫埋M去零食物語度揀想食乜嘢，唔使講梗係朱古力，我仲買咗兩包粟子。我哋一邊搭車一邊食，討論邊隻朱古力好食，Z就倍咗佢哋個阿姐搭咗一個站，喺調景嶺join返我哋，結果我叫M攞埋ｄ朱古力返屋企，見到佢攬住２盒朱古力唔放個樣，真係幾似松鼠！

今天有少許無奈，見住２個supervisors好頭痛，自己行行企企stand by咗成２個幾３個鐘頭，乜都幫唔到手，新同事O、同學你M和Z叫我無嘢就早ｄ走，心裏不太好受，希望佢哋可以大步檻過！

I was happy yesterday.

昨天本來約了「士多啤梨」(即係M）夜晚一齊睇港男Live，但晏晝Carmen突然叫我幫海倫dubbing 3份稿，我便欣然答應，點知攪攪下變咗dub７份稿，由夜晚7點dub到12點幾，好開心因為有份參與！不過睇唔到大show幕後，港男喎！有ｄ遺憾，惟有等下次港姐show喇！

我看見，雖然大家都滿口怨言，但一樣攞個心出來，互相幫助，將件事做好的Passion，令我很感動！

未dubbing 之前，我諮詢過Suppervisor S的意見，他勸我唔駛一定將份稿扭咁多（攪咁多花臣），扭到就扭（即係唔好勉強一定要扭），仲話個節目唔係俾師奶睇，係無人睇（我估佢係講笑）。Dinner時，M預計Marty(artist)應該唔會照我的方法配音，初時我未聽過Marty把聲，又唔識佢，所以有保留，後來發現Marty個人，其實都幾謙厚和勤力，加上佢主動問我ｄ稿點讀，我便開始放肆，但因時間所限，大拿拿dub７份稿，人哋仲要今次無得計show錢，所以有ｄ地方，我都隻眼開隻眼閉，ok pass就算。

我坦白跟Marty說，他的聲底好靚，仲可以表現好ｄ，下次如果時間許可，我會將佢把聲扭到最好先出街，他竟然話好喎！我一定會將呢件事講返俾M知道，他睇錯人哋。

同學仔F形容同學仔M個樣似士多啤梨，Lunch果陣我有將呢件事講俾M知，咁咪好多女仔鍾意"０答"佢咯，仲建議他將頭髮染成綠色，就更加似，攪到M鬼咁開心。

同學仔之中，我與M最投緣。M昨晚說因為我好，所以佢話同我最friend，我信佢架，因為我都覺得佢對我好，其實個個同學仔都對我唔錯架！尤其是M和F差不多每天找我傾心事，有d似返學！

每日返去都會直接或間接聽到唔同人有唔同抱怨，我記得以前我也會這樣，可能我現在仍是一樣。我跟印印說，昨晚遲了回家的原因，印印問我為什麼佢哋唔做，俾晒我做？我便答，他們叫到我便做了，我來是學習，做多ｄ我咪學快ｄ囉！

還有,Carmen跟我說，她睇過我寫的「泰國大減價」出街，她話好好笑！唉！我到而家仲未睇過自己ｄ嘢，聽日有時間要錄返留底！想想這十幾天，每星期一至五自己有份的節目將會出街，roller見到自己個名，真係好感動！好幸運！如果人工高ｄ，工作量少ｄ，質素高ｄ，咁就perfect！

Crash

昨晚跟intern Z往電影中心睇Crash，齣戲裏面好多位都可以諗好耐，對人性兩極的描寫細膩感人。多個角色裏面，我最喜歡小女孩的童真。佩服編劇對２名警員的情節，尤其Matt Dillon釋演Officer Ryan角色很立體，與Thandie Newton釋演的Christine角色的衝突。
凡事都可以做，但對別人或自己不一定都有益處，更深層探討。人性同時存在正負面，眼睛別放在別人的行為上，總要在自己的行為和誠實上，「言多必失」是永恒真理！








睇戲前逛電影中心裏的精品店，Z知我想睇金賽博士，便幫我借了VCD。之後去了廟街榕樹頭附近一間古老茶餐廳，歎咗一杯紅豆蓮子冰、點了一碗蟹肉伊麵和一碟享譽五十年的焗排骨飯，跟肖狗巨蟹座的Z無所不談，感覺輕鬆！初認識Z時，覺得他的樣子和動態也很像過氣「男主角」。可是與Z相處完全freedom，但與過氣「男主角」則多了一丁點「雜質」。

今晚往深水埗換Wireless card，便約了老朋友見面，往另一間茶餐廳各自叫了紅豆冰，聊聊天談近況......很享受每次約會都由他結帳。然後他問我：「識唔識路搭地鐵？」我往地鐵方向一指，他便安心地讚我「大個女」咯！不久之前，他還時常找我晦氣；不過，今天又變返我的老友「哥哥」！

在他（或者其他老友）眼中，我仍是被痛錫！幸福有時不用尋找，只待發現和珍惜！

每天2個問題

今天的靈修功課便是每天問自己這2條問題:
1）我今天面臨的最大的問題是什麼？
2）我今天要做什麼來解決這個問題？

然後努力練習可能思想，究竟什麼是我「無法解決的問題」，然後思想它是可能的，如果.......

“你就信麼，你將要看見比這更大的事。”約翰福音1章50節

我最大的問題或者是......信心，對嗎？

生果重遊感言

從來沒有想過重返故地，幾天前竟然坐在昔日的崗位。
四年幾前便坐在那裏工作，突然被out，當日心情很難受，促使我做生意的決心，「無生果金唔使死」便是那種傲骨！
四年過去，心情仍難免有點漣漪，幸好不成巨浪，
依家返去HEA，縱使他朝返入去工作，輕鬆自在，已經沒有任何壓力可言！
今天興幸還可以誇口說，無生果金的確唔使死！
不過辛苦ｄ囉！

係欣賞，唔係喜歡！

細細個讀書果陣幾崇拜佢，我曾經修過他的五天短期課程，可惜當年的筆記早已不知所蹤了！依家果種係欣賞！

我哋相識都幾奇妙！好耐之前係我識佢，But 佢唔識我；
兩三年前，聽講佢經常重覆又重覆聽家人說我的事，應該悶死佢；
大半年前才相識，大家有點尷尬，直情大家都唔敢傾偈。

自從佢放完假返嚟之後，總覺得佢望我ｄ眼神有ｄ怪，
覺得佢好似想同我傾偈，但又唔知點開口咁。
我亦好想同佢討論下一ｄ野，不過未有機會。

一上一落的眼神接觸沒有太多次，佢望我閃，我望佢閃．．．
今日佢竟然幾次唔記得重要既事，
今天我坐在一位剛從台灣返港的男性朋友隔籬，
臨走前，終於他先開口say hello,未等佢講完即刻應左聲，然後急步走開了！
佢．．．太高難度啩！

「紅日」現身

上週六臨時被安排到「一舊雲雀局」幫手，今次是「黑芹」做嘉賓！開心到我吖！！至少開心過上次見「紅棗兒」！

雖然有機會見到「黑芹」真身，可惜我大部分時間在廚房，根本聽唔晒成個訪問，好遺憾！！

「黑芹」是我喜歡的少數香港藝人其中一員，因為他的確幾有才華，亦曾經「黑仔」過，曾經與他同期出道的藝人都比他早紅。至今捱左足足１７年，幾年前才終於捱出頭來，毅力過人！好嘢！

＜紅日＞是他在低潮時自勉之作，亦是我自己的打氣歌，以前我常與阿敏一起唱，阿敏都可以背晒歌詞，依家教佢唱新歌已經背唔到．．．．．

１７年並不是一個短時間，楊過等小龍女都只不過等左１６年，咁我計落應該捱幾多年先至出頭呢？

We're Addams Family?!

前天跟助導B一起午膳，原來他早知道我的「秘密」＿＿
我寫稿時見唔到其他人行過，甚至人哋企喺隔籬也不察覺，
事關他無意中測試過我！

唔知從幾時開始，某幾個同事，甚至介爺(Assistance Creative Director)都喜歡無原無故站在我身旁睇我寫稿，
M和F仲開始喜歡一個企我左邊，另一個企我右邊，
分別對住我講嘢，係不斷咁講嘢！
誓言要訓練我，等我習慣咁樣先至可以喺呢度生存！

今天Supervisor S在我log 帶時，站在我身旁，
我見到他陰陰咀笑，便知道．．．應該秘密被揭發了！

之前還有，我沒有方向感和記人名差等，
亦成為了同學仔M的題材。
每次lift未開，M會事先張揚「轉左」抑或「轉右」行，
我都次次行錯方向，M則若無其事咁行返埋位，
大家就會很高興！

如果俾佢哋知道埋我去完廁所返位都行錯方向的秘密，
佢哋分分鐘可能會捕喺女廁門口！
所以我梅花間竹咁去唔同廁所，費事俾佢哋發現！

M每天總會至少一次搵我吐苦水傾心事，
我心裏亦有替他不值，覺得他應該可以有更好發展，
奈何機會未到。

F每天都有溝女新思維，我們三個談「美男廚房」，
由F主持，M建議F每次都要用「一公升」打獻汁，
仲要即場Live打獻．．．．．．又再笑死咗！

這兩天F問我嚟咗咁耐，有冇睇中邊個男仔，等佢幫手，
我則答佢，我未ready拍拖喎！
佢食完飯鬼鬼馬馬咁話，頭先喺canteen有個男人望咗我好耐，
我和M異口同聲對住佢講：痴線！
F無端端揚言不會撇下我一個人食飯，聽住先！

喺「大家庭」工作十足十成個「愛生事家庭」咁！

首次晚膳

今天與兩位supervisors和部分同事吃晚飯，很怕大伙兒背後說三道短，拿人家作笑抦的玩意，我卻呆坐倍笑，那種感覺不太自在。

同組同事很喜歡扮同組另一位不在場的女同事，因為她來自台灣，廣東口音不準。Supervisor W原來模仿天份很高，上晒身咁扮這位女同事：

佢打電話俾ｄ客事會講：「我係『鷄鷄！』你哋邊個係『負責淫』？」同事話果度唔會有人負責「淫」喎！

又有一次問個PA：「隔籬『鷄』（街）仲有冇嘢拍？你哋究竟『含』唔『含』（行唔行）架？」

仲有一次她說帶隻狗出街，轉個頭隻狗女俾狗女「淫」咗（其實佢本來想講「擒」），獸醫話狗女懷孕既機會係９９％，所以佢就掩咗隻狗女，獸醫掩完之後話，原來隻狗女無懷孕。

Supervisor S贈興話，最攪笑係呢位女同事到廿幾歲先知，原來她的媽媽係香港人。事緣係由細到大，佢成日聽佢媽媽叫佢「仆街」，佢唔知道點解，後來到咗香港，先至知道這兩個字係香港粗口，所以佢先知佢媽媽係「香港人」！

W仲話，如果找她拍「星級廚房」一定好攪笑，又扮佢話：
「今日教大家煮『拮你鷄』（吉烈鷄），材料係鷄一隻，．．．」

W整晚邊說邊盯著自己，如坐針氈，不其然覺得平日自己也會成了他們的話題。另一位則整晚很少說話，．．．．．．我深怕被這氣氛感染，寧可少說話多工作，以後還是減少這些飯局。

其間馬國明行過，笑容可掬跟我打招呼。記得上次遇到陳豪，他也是有禮點頭。希望我也學習這種好習慣，但願在那裏見到笑容處處，總好過聽講流言蜚語。

重遇．．．再離開！

再次跟他以電郵交談，昔日的火花冷卻了！

他再次出現令我看清自己以往的愚昧無知，
突然重遇，又再消失，
漫不經心，貫徹風格。

沒有尋根究底追問，沒有期待何時重臨，
反而湧起異常莫名的恐懼，
吞雲吐霧，心情沉澱！
愛必須付重價，從來沒有正比回報。

沉著應戰

早幾天與P談新工作的情況，坦白說，我未試過在一間如此混亂兼毫無士氣的公司內工作。

可能是自己的記性差，所以每到一個新環境，首要的工作一定是重整資料。對於沒有系統的環境，這項工作頗艱巨，不過已於上週末大致完成。

聽說昨晚已經播出我首份Project，可惜因為是Pay Channel，連我自己仍未有時間play back.

沉悶嗎？倒也不是；
充實嗎？還在學習和適應階段。

最不習慣是撰寫影像文字稿；既要撰稿，同時兼顧畫面。
其次便不習慣人多是非多的環境，
不知從那時開始，變了謹言慎行，
最怕成為別人的絆腳石，罪名擔當不了！
說話是藝術，也可以是兇器，
未達標，仍在努力中。

結識了一班年輕過我很多的新同事，
聽著他們說話，猶如看見昔日自己的影子；
年少輕狂，滿腔嫉俗，卻不失自信。

彷彿看不清前景，幸而心底平安。
人工少也有好處，不存在金錢上的壓力吧！
很感激老友P的鼓勵：「沉著應戰！」
提起精神，振作奮鬥吧！

「耶和華是我的牧者，我必不致缺乏。
祂使我躺臥在青草地上，領我到可安歇的水邊；
祂使我的靈魂甦醒，為自己的名引導我走義路。
我雖然行過死蔭的幽谷，也不怕遭害，因為你與我同在。
你的杖、你的竿、都安慰我。
在我敵人面前，你為我擺設筵席。
你用油膏了我的頭，使我的福杯滿溢。
我一生一世必有恩惠慈愛隨著我；
我且要住在耶和華的殿中，直到永遠。」
久違了的這段窩心的金句，既是明燈，亦是指標。

附註：原本這兩星期無法釋懷，怕自己任性的決定，令家人操心；恰巧從靈修、講道和家人朋友的慰問中，得到莫大的安慰，且深信這是從上而來的恩典。

一公升續集

前兩日「一公升」再次發言，他表示試過一日十二三次，到最後的兩三次才開始痛，全場轟笑！

大家又笑他怎可能一日十二三次的吹水言論。M直指「一公升」講多咗個十，應該是兩三次！但「一公升」堅稱他能一日內「湯蛇」十二三次。我則挑戰他，他一日都沒有咖啡杯的份量；如果盛滿一杯，必定猝死無疑！

全場又在歡笑中，吃了一個無聊的午餐！

路是人行出來，我正需要明燈指引！

無工開的日子，盼望有工開、有糧出；
有工開的日子，嫌惡人工低、冇嘢學。

想工作的時候，偏偏沒有機會；
有機會工作時，慢慢咀嚼細活。

四年原來改變很多事，
開始擔心工作是否太理想化？
甚至脫離生活基本元素？
或者高估了自己的生存價值？
決定在這裏工作是否太任性？

去或留、堅持還是終止，
等候著未可知的答案！
心裏默默又浮起這念頭：路是人行出來！

每日一公升？

今天小師弟風水稱，男人（精液）每天有一公升的儲存量。
我和另一位小師弟Martin立即轟笑，M搶白，血都無咁多啦！

M笑問他，可有量過那一公升，身體怎樣負荷呢？（小腸氣咁大都裝唔到一公升啦！）
我還送他一句，究竟他可知道精液儲存在那裏？
風水竟然挑戰我，他是男人，所以他比我清楚。
當然又一陣轟笑。

M說，最近有一位日本男優（男脫星），一日內拍AV八次，結果要休息三個月。
M好奇地問他，他每日如何洩洪一公升？床上？
我拿著匙羮搶答，就算係男人最「當打」的時候，一天三次都痛不欲生。他想過了頭，所以谷精上腦，不過腦怎可能藏一公升的精液呢！
最後可愛的風水依然堅持，他明明看書得知，男人每日有一公升，他選擇堅持。
註：上述故事純屬真人真事，並非虛構。想不到今時今日的香港，仍然有每日一公升的廿幾歲花仔！！

一星期之後的期待

上星期四，所有的課程算正式完結，鴻爺將我們分派到不同部門工作，我和金仔便被指派到Pay Channel的生活台。鴻爺說，我們只是暫時呢一個月在那裏 on job trainning，之後會返Programme Development。

這幾天我和金仔各自跟不同的節目錄影，明晚我便有機會跟dubbing。暫時我感覺這份工作較我想像中輕鬆，至少我知道有睡眠時間，不像雜誌一樣天昏地暗，不見天日。不過電視台的工作量遠比報紙的工作量多，每天平均工作至少十二小時以上．．．．．．

今晚我跟母親大人閒聊，她希望我會在三色台工作學習一年。但願重重的心理關口能早日衝破！！

人性？？

今日聽了一個故事：

農夫將他的過期偉哥給農場裏其中一隻公鷄食，第一天這隻公鷄攪掂了農場裏１００隻母鷄，第二天這隻公鷄雄風未盡，再攪掂埋另外的１００隻鴨乸，第三天連其餘的１００隻鵝都唔放過。第四天農夫一早起來，便見到這隻公鷄倒臥在路邊，農夫在想公鷄應該死於精盡鷄亡吧！當農夫正想為公鷄風光大葬時，豈料公鷄突然微微動一動身子，向農夫示意唔好嘈，說：「唔好嘈呀！天上面果兩隻鷹就快俾我呃到佢哋落嚟！」

固執原來就係咁好笑！

另一個IQ題：

菠蘿麭強姦了叉燒麭之後，會生什麼？？

答案是　：　菠蘿叉燒麭

Tea Bag Theory

今早聽到「茶包」道理，When you're go through now, do not fear, because it is blessing. Such like water are boiling, tea are drawing. （水越滾，茶香越濃）When we're in the tough time, DO NOT FEAR, IT BEGIN TO BE HEALED TIL WE'LL NOT TO FEAR ANYMORE. IT REALLY COME TO BE BLESSING.

Everyone shall have a saving account, count on the gift of Jesus Christ. We're in a whatever tough time, The pastor encourages us to count on gifts of Jesus Christ in the past, keep our eyes opening to see his love, whenever we are in the dark, helping us to go through, and the time will be pass by.

然後，再一次聽到我最愛的聖經金句　－－　詩篇２３篇

「耶和華是我的牧者，我必不致缺乏。祂使我躺臥在青草地上，領我到可安歇的水邊。祂使我的靈魂甦醒，為自己的名引導我走義路。我雖然行過死蔭的幽谷、也不怕遭害‧因為你與我同在‧你的杖、你的竿、都安慰我。在我敵人面前、你為我擺設筵席‧你用油膏了我的頭、使我的福杯滿溢。我一生一世必有恩惠慈愛隨著我‧我且要住在耶和華的殿中、直到永遠。」

別讓黑暗遮蔽我們的眼睛，惟有靠數算主恩，才能平安渡過死蔭幽谷。