你會留著他／她的短信嗎?

「如果你的男朋友去世之前，留咗個短信畀你，你會唔會留住？抑或delete佢？」今日台灣人問我。

我答他未試過這種情況，他續問我：會唔會再睇這個短信？

我想我會不停翻閱多次，直至delete；因為我是那種先將自己推至谷底，然後等待反彈。他似乎對我的答案感到意外，而他則說他不會。

這個問題卻一直在腦海思索......

晚上我問Baby同樣的問題，他的答案與台灣人相同。他解釋，雖然keep住喺手機，但未必會再看這則短信，怕自己會唔開心。

如果是舊情人的物件，我的答案便可能會跟Baby一樣，因為家裏一大堆！

就快甩難！

台灣人老細昨天宣佈，由下星期開始，我唔使跟廠。
嘩！開心得我吖！......之不過諗諗吓，唔知係咪我跟廠有咩問題而調走我？

好奇心驅使我今日開廠時，直接問佢。佢解釋話，唔係因為我跟廠跟得差或者有問題，而係因為某某要跟咩，某某又要跟咩，又有新同事嚟...諸如此類，所以我就唔使跟廠，做返老本行，即係包片嘞！

點都好喇！開咗廠咁耐，真係有啲唔捨得；雖然每天要寫稿同埋啃大量資料，工作濕碎，但係之前未試過，辛苦得嚟幾好玩，亦都係幾好學習與唔同人合作相處既機會。唔知幾時我會重返七廠呢？

不過最重要係，唔使跟廠就有機會多啲時間陪Baby，雖然只不過係「可能」、「有機會」多啲，我都可以乘機透返下！

「進步」利是

開廠咁耐，除咗工作經驗之外，最大得著就係識到芷菁。

其實早在她與阿譚拍拖時，我已經對佢既印象好好！（唔係馬後炮！）

認識她之後，更加發覺她勤力、好學、友善等優點，不過佢都幾迷信......

雖然同芷菁唔熟，但係我好榮幸已經收過佢送畀我既聖誕卡同埋利是！由阿虫操刀的利是封上面印住一句好meaningful既說話：

向好處去，朝理想去
身體更健康，事業和學業
一天比一天好
進步是不留戀過去，
保持身心健康，
充滿智慧的向前去

好一句「進步是不留戀過去，保持身心健康，充滿智慧的向前去！」
正正是我所須的祝福！

幾多位? 三個?

不得不承認今次談戀愛令本身已「奪爆」的我更加奪，不過真係冇諗過「奪」得咁爆！

話說喺剛剛過咗既星期日，Baby一收到我緊急既「求救」之後，上咗嚟，夜晚我哋兩個人就去下邨既大排檔食飯。

差唔多兩年冇見，老闆娘竟然認得我，順口問：「幾多位！」
我亦好順口咁答：「三位！」
在旁的Baby同埋老闆娘，兩對眼大到幾乎跌出嚟咁濟：「吓！三位？？」
Baby仲補多腳：「你邊度數到三位呀？」

「奪」到咁樣！惟有慨歎家陣啲「M型病毒」肆虐，越來越嚴重。