尋晚俾我發現印印原來幫阿敏刷牙好求其，所以我即時向她示範之前牙醫教過我地幫阿敏的有效刷牙方法，印印唔憤氣，因為呢幾年都係佢負責幫阿敏刷牙，而且覺得自己識晒，唔使我教。仲駁咀咁話，因為阿敏驚我，所以我幫他刷牙時會較合作;但阿敏知道佢係工人，所以蝦佢，分分鐘會咬佢添!話如果阿敏唔同佢合作，叫我以後幫阿敏刷牙，尋晚佢黑口黑面咁俾我睇。
經過我同軍師商議之後，我尋晚叫佢今朝哎我起身,我幫阿敏刷部分，她站在旁邊睇，結果到佢刷果陣就亂0黎，求其撩幾撩就叫攪掂，我弊指住阿敏牙縫果粒飯話俾佢知，佢就鬼食泥咁邊刷邊說:阿娣最污糟，阿娣唔乾淨，阿敏唔使返學.....一路刷就一路講俾我聽，跟住我沉住氣，叫佢送完阿敏返學之後，唔好買餸住，返0黎屋企先，咁佢就收聲問我做乜，我費事0係阿敏面前同佢嘈，所以重覆一次頭先講0既0野!
她返家後，我淨係話我幫她刷牙，嚇到她鬼殺咁嘈，死都唔肯;跟住我就叫她幫我刷，然後step by step咁執，直至她完全明白整個步驟為止，過程之中如果她做對了，我就讚佢做得0岩!上課完畢時她的表現都幾開心，BUT 晏晝開始又唔出聲，我就扮忙扮睇佢唔到。
到夜晚實戰，仍然係我先幫阿敏刷牙，她站在旁邊睇，跟住到她。今次她終於跟住正確0既方法幫阿敏刷，不過太過大力，我估是弄痛阿敏，他又唔識表達，梗係縮啦!我就解釋俾佢聽，阿敏的牙周病嚴重，當牙刷太大力在爛肉上面磨擦會令阿敏痛，所以我地初初要細力d......
經過兩日三次的實戰，印印的表情話俾我知，她明白她做錯什麼了!
我在想原來每個人都以為他的ego很強，不容任何人challenge，甚至推卸責任，總之係人地錯晒自己無錯;但另一方面，我們每一個人亦很脆弱，恐懼自己無能力應付而逃避責任，怕別人知道自己的軟弱而故作堅強，衍生種種惡行，到底是我們在保護自我，抑或任由自我摧毀我們真我呢?
